O longo e participativo processo de reforma constitucional cubana culminou no dia 24 de fevereiro, domingo, com umha votaçom superior aos 86\% de apoio à nova Carta Magna, segundo dados oficiais da Comissom Nacional Eleitoral.

A adesom popular foi de 6.826.169 votos, ficando o "nom" em 706.400, o que supom 9\%. 127.100 fôrom votos nulos (1,68\%) e 198.674 brancos (2,54\%).

A participaçom foi de 84,41\%, que em número de participantes é de 7.484.343 pessoas adultas convocadas e que comparecêrom.

A aprovaçom prévia na Assembleia Nacional do Poder Popular, acontecida a 22 de dezembro, foi neste domingo ratificada polo povo, que participou num longo processo de estudo, emendas, discussom e, agora, ratificaçom da nova Constituiçom socialista cubana, que vem substituir a de 1976, também socialista.

Mudanças favorecedoras do mercado para tentar impulsionar a economia sob controlo socialista fam parte do novo texto, que altera, alargando-as, as formas de propriedade e outros aspetos da legalidade cubana, preservando e mesmo aprofundando outros aspetos do socialismo e ratificando o comunismo como objetivo do processo de transiçom socialista que o país vive desde a tomada do poder pola classe trabalhadora em 1959.