Polo menos duas pessoas fôrom feridas, acabando nas urgências, por causa da violência policial contra a concentraçom popular que denunciava, às portas do centro social, a invasom policial do espaço autogerido.

A polícia municipal corunhesa entrou nesta mesma manhá no espaço ocupado polo movimento popular da Corunha, forçando o despejo, se bem a polícia parece nom ter encontrado pessoas no interior no momento da invasom.

Rocío Fraga, vereadora de "Igualdade e Diversidade" com trajetória como ativista feminista, antimilitarista, estudantil e ecologista, é a responsável política pola atuaçom repressiva, que pom fim ao conflito derivado da negativa do coletivo popular a aceder à institucionalizaçom do projeto, proposta polo governo da 'Maré Atlántica', e que para o CS A Insubmissa suporia umha "desnaturalizaçom" do mesmo.

Por seu turno, a Cámara Municipal pretende converter o espaço ocupado no "Centro de Produçom de Desenho Cidea", alegadamente dedicado a "impulsionar a criatividade" (sic).

A defesa jurídica do espaço ocupado já apontou para umha possível ilegalidade da medida coercitiva, umha vez que teria incumprido prazos e outros formalismos.

Meios populares da Corunha e redes sociais divulgam nestes momentos umha convocatória para se concentrar às portas do Centro Social às 20 horas, para denunciar o despejo policial da Insubmissa, nas antigas instalaçons da 'Comandáncia de Obras' da cidade herculina.