Con esta medida legalmente discutíbel e eticamente inaceptábel, o goberno do estado supeditaba a saúde, o medio ambiente e o sector pesqueiro da ría ao intereses dunha empresa privada que conta cun consello de administración cheo de altos cargos do PP.
Neste documental Galiza Contrainfo bota man de seis voces que analizan a situación de Ence e as súas consecuencias desde distintas perspectivas. Ás de integrantes da APDR súmanse as de Fernando Filgueira (alergólogo), Miguel Cuña (sindicalista), veciñanza de Lourizán, unha mariscadora ou Leonor González Prieto, máis coñecida como “Nené”, a primeira presidenta da asociación.
Pretendese dar a coñecer como era a Pontevedra anterior a Ence, as repercusións sociais, económicas e para a saúde da poboación, así como recoñecer a loita contra este complexo industrial que hipoteca o futuro da ría.
Galiza Contrainfo é unha iniciativa independente, non comercial e autoxerida de contra-información audiovisual galega, que xorde da necesidade de difundir os seus traballos, máis tamén coa intención de construír un espazo que serva para darlle visibilidade á produción audiovisual de comunicación alternativa que se desenvolve na Galiza.
Este documental presentouse no mes de xullo en Pontevedra, pasará por Ferrol, Ourense, Vigo e o 23 de agosto proxectarase en Marín, ás 20,30 na biblioteca municipal.