A chamada 'pobreza energética', que nom é em realidade nada diferente a umha relaçom mercantil capitalista aplicada sobre a energia, afeta centenares de milhares de pessoas na Galiza.

É por isso que diversos coletivos convocam umha manifestaçom no dia 21 na capital da comarca de Trasancos.

Reproduzimos a seguir o texto da convocatória recebida polo Diário Liberdade das Marchas da Dignidade de Trasancos:

O recibo da luz volveu a subir en Novembro 2016, co que acumula sete meses consecutivos de incrementos, o que representa unha suba media por fogar do 27,8%. En Outubro, cunha lexislación que beneficia ás grandes compañías eléctricas era o Tribunal Supremo o que tombaba o chamado "bono social", e obrigaba a indemnizar as eléctricas por ter que pagar esa tarifa subvencionada que levaba dous anos en vigor. O tribunal recoñece o "dereito" das compañías eléctricas a cobrar unha indemnización polas cantidades que tivo que asumir, o que repercutirá na tarifa que temos que pagar todas. Despois da Sentenza do Supremo faborábel ás coorporacións eléctricas, o Goberno ten previsto aprobar antes de fin de ano un Real Decreto-Lei sobre o financiamento do Bono Social eléctrico que afectará en maior medida aos fogares e non aos grandes consumidores, segundo denuncia a cooperativa Som Energia. Mentres, Iberdrola, Endesa e Gas Natural-Fenosa rexistraron un beneficio conxunto nos seis primeiros meses de 2016 de perto de 2.900 millóns de euros... mentres, na Galiza son máis de 110.000 fogares afectados pola pobreza enerxética e no resto do estado supera os catro millóns de persoas afectadas...

Mobilizamo-nos para esixir medidas contra a pobreza enerxética, na súa prevención e eliminación, mais tamén na denuncia aos oligopolios eléctricos que, co apoio gobernamental, impoñen prezos, baleirando as economías domésticas e as arcas públicas, para os seus beneficios privados. Desde principios deste mes veñen-se realizando mobilizacións en toda Europa, para denunciar esta situación, onde moitos fogares padecen a pobreza enerxética. Este 21 de Decembro, están convocadas varias mobilizacións en Galiza e en moitas cidades do resto do Estado, para que, entre outras demandas, non se permita ás compañías eléctricas que corte a luz a familias con problemas económicos. O recente casos de Rosa, unha anciá de Reus (Catalunya) que finaba queimada polo lume causado po unhas velas, logo de que Gas Natural Fenosa cortara a subministración eléctrica sen informar aos servizos sociais; mesmo, con anterioridade en Ourense, onde outro ancián, de 87 anos, morría queimado, e o seu irmán quedaba con queimaduras graves pola mesma razón; crearon unha onda de indignación. Cada vez son máis as persoas que queren rematar xa coas tarifas abusivas e os cortes de luz a familias sen recursos.

O estado neoliberal avanza na súa consolidación e o que tiña que ser o recoñecemento do dereito de acceso universal á enerxía e á auga como subministración básica, ao igual que o dereito á vivenda digna e adecuada, o dereito á alimentación, aos coidados, á educación e á saúde, a un traballo digno ou a unha renda básica, para que cada persoa poida gozar dunhas condicións de vida dignas; o estado neoliberal converte, o dereito á enerxía como servizo público esencial, nun negocio privado con beneficios garantidos, controlado por cinco corporacións eléctricas que conforman un oligopolio... O estado neoliberal, fai do dereito beneficencia; e en vez de desenvolver medidas estruturais, con solucións inmediatas, permanentes e preventivas... aplica só medidas paliativas, perpetuadoras da pobreza e a dependencia, de por vida, dos servizos sociais de ducias de miles de fogares.

Cumpre xa pasar a ofensiva, non se mantén que o oligopolio conformado polas corporacións eléctricas manteñan en xaque a un Estado e na pobreza enerxética a millóns de persoas, logo de facer-se con máis de 103.000 millóns de euros cobrados ilexitimamente entre o período 1997 e 2013 ou que siga reclamando ducias de miles de millóns polo chamado "déficit enerxético" sen ningún tipo de control, nin auditoría.

Polo que Reclamamos: a prohibición legal de todos os cortes de luz a familias con problemas económicos... O fin aos abusos tarifarios... A creación dunha auténtica tarifa social... O recoñecemento e devolución por parte das grandes eléctricas dos 3.500 millóns de euros que cobraron indebidamente... A Auditoría ao sistema eléctrico... A aplicación do tipo de IVA superreducido á electricidade... A creación dunha tarifa eléctrica galega... e o rescate para o sector público de activos enerxéticos hoxe en mans privadas... 

MANIFESTACIÓN DIA: MÉRCORES 21 DE DECEMBRO. HORA: 7 DA TARDE (19:00HS). LUGAR DE SAÍDA E CHEGADA: PRAZA AMADA GARCIA (DIANTE DO EDIFICIO ADMINISTRATIVO DA XUNTA DE GALICIA),

PERCORRIDO: RÚAS REAL, TERRA, IGREXA, PRAZA DO CALLAO E ROCHEL.