O acidente laboral aconteceu nesta mesma manhá e ainda nom há explicaçom oficial sobre o acontecido, se bem parece que o operário fazia labores de reparaçom e pertencia ao quadro de pessoal de umha auxiliar. Entre as primeiras informaçons, atribui-se ao falecido umha idade entre 50 e 60 anos.

O Diário Liberdade contatou com fontes do pessoal de Navantia, que confirmárom que a empresa em que trabalhava o operário é Nervión. O trabalhador acidentado chamava-se Gerardo e levava anos trabalhando no setor naval.

Sem se conhecerem os pormenores do caso, o que é certo é que no departamento de reparaçons, onde aconteceu o acidente, trabalha-se habitualmente contra o relógio e nos últimos tempos venhem realizando um grande número de horas extras, com jornadas de até 12-14 horas, segundo confirmárom ao Diário Liberdade fontes do pessoal do estaleiro, cuja atividade vai ficar paralisada durante o resto da jornada, à espera de se decidirem açons de protesto.

Para as 10:15 estava convocada umha assembleia de trabalhadoras e trabalhadores às portas do estaleiro fenês para tratar sobre uns factos ainda nom esclarecidos.