Em plena conferência de imprensa no Palácio da Moncloa de Madrid, o primeiro-ministro da República da Irlanda deu como presente a Mariano Rajoi umha camisola da Seleçom Nacional Galega de futebol gaélico com o nome do líder do PP nas costas.

Um facto inédito que levou aos meios internacionais a existência oficial de umha seleçom desportiva galega que participa em campeonatos internacionais, apesar do habitual silenciamento dos grandes meios sobre esse facto e o combate frontal das instituiçons espanholas contra os direitos nacionais galegos, também no ámbito desportivo.

Com efeito, som desportos menos difundidos como o futebol gaélico que permitem a existência mais ou menos "normalizada" de expressons nacionais através de seleçons galegas em desportos como o futebol gaélico.

Em nengum caso Mariano Rajoi ou qualquer outro governo espanhol teria dedicado um segundo de exposiçom mediática a iniciativas nacionais galegas como essa. No entanto, o primeiro-ministro irlandês fijo de altofalante involuntário da reivindicaçom nacional galega ao mostrar a camisola do desporto mais internacional originário do seu país, Irlanda, e que na Galiza está a fazer um grande sucesso nos últimos anos.

Grandes meios de comunicaçom difundírom imediatamente a imagem: dous chefes de estado a exibirem a camisola representativa de umha naçom sem Estado, onde por acaso nasceu o renegado Rajoi: a Galiza.