Diante desta nova defensa do convenio por parte do Concello, desde Touradas fóra de Pontevedra, colectivo que desde 2010 leva traballando pola abolición das touradas desde a Pontevedra, reafirman que o diñeiro obtido polos Lozano grazas ao convenio da vergoña serve para axudar a soster "o seu negocio criminal, polo que non ten ningunha xustificación". Eses señores son empresarios, e o diñeiro que reciben emprégano en manter a súa empresa, independentemente dos motivos que o Concello alegue para manter o convenio.
En consecuencia, para Touradas fóra de Pontevedra o mantemento do “torneo medieval” na Feira Franca e calquera outra utilización (das pouquísimas) que o Concello dá á praza, nunca xustificarán a entrega de diñeiro público a empresarios taurinos. "De verdade que non se poden buscar actividades alternativas ao famoso torneo? Esa actividade vaise manter na programación da Feira Franca desde agora para sempre, ano tras ano igual? Lembramos que este convenio existe desde antes de que na Feira Franca se organizase o torneo medieval".
O posicionamento abolicionista, como todo, demóstrase na práctica, e declararse antitaurino mentres se mantén este convenio é unha contradicción evidente. Na lóxica institucionalista quizá se poda pensar que é unha contradicción “asumíbel” porque é posíbel que non reste moitos votos, mais da plataforma contra as touradas dubidan "que esa deba ser a lóxica de quen busca a transformación e progreso sociais".
"Desconcértannos as críticas do alcalde ante unha suposta busca de rendibilidade política por parte de quen defendemos o fin do convenio. Desde logo ese non é o caso de Touradas fóra de Pontevedra, entidade na que participamos persoas con diversas visións e na grande maioría dos casos sen ningunha vinculación partidaria. Se algunha vez se tivese reunido con nós sabería de primeira man que somos veciñas e veciños de Pontevedra, que realizamos traballo de base na nosa cidade desde hai anos e que o noso interese exclusivo é a abolición das touradas en Galiza e alá onde exista semellante barbaridade".