Com o seu conselheiro delegado detido por financiamento irregular do PP em Madrid, Juan Miguel Villar Mir, um dos maiores acionistas do grupo multinacional Ferroglobe (ex-Ferroatlántica), tenciona vender as centrais hidroelétricas da Costa da Morte (rios Jalhas e Grande), se a Junta da Galiza o permitir.

400 postos de trabalho diretos e algumhas centenas mais indiretos estám em jogo na operaçom especulativa de Villar Mir, que quer segregar as atividades de ferroliga e produçom hidroelétrica na concessom vigorante desde os anos 90, para vender as hidroelétricas a umha empresa sem determinar, provavelmente Brookfield, de capital norte-americano, por umha quantidade de 153,4 milhons de euros, ou entom outra firma de capital francês.

A reaçom do pessoal foi iniciar greves, mobilizaçons e reclamar ao governo do PP, "amigo" do milionário Villar Mir, que nom autorize a segregaçom prévia à operaçom de venda de parte da companhia OHL. 'Águas da Galiza' é o organismo público que deve decidir sobre a possível operaçom financeira-empresarial.

Marcha desde Cee e mobilizaçom nacional em Compostela

Depois de vários dias de caminhada, centenas de trabalhadores e trabalhadoras chegárom a Compostela neste sábado, encabeçando umha mobilizaçom de milhares de apoiantes, incluindo forças políticas da oposiçom parlamentar e centrais sindicais.

A defesa dos postos de trabalho no setor conjugou-se com a reivindicaçom da soberania sobre a produçom e a proteçom do meio e recursos naturais galegos.