O ferrolano agredido acabou no hospital com importantes lesons na cabeça, incluindo fraturas, fissuras, hematomas e cortes.

Nom é o primeiro ataque fascista acontecido na Galiza nos últimos tempos, existindo antecedentes de agressons diversas noutros pontos, o último Ponte Vedra, contra um militante de Galiza Nova (organizaçom juvenil).

No caso de Ferrol, os agressores atuárom em grupo (entre oito e dez efetivos) à noite e numha das ruas principais da cidade, a rua Real, umha área comercial que deveria ter as imagens da agressom registadas pola vídeo-vigiláncia existente. A vítima foi espancada brutalmente no chao, chegando a perder a consciência até ser conduzido ao hospital, onde lhe fôrom praticados diferentes exames e atendimento para os ferimentos, inclusive no serviço maxilo-facial do Materno-Infantil da Corunha, segundo informou o digital Sermos Galiza.

A agressom foi desta vez dirigida contra um conhecido militante de Causa Galiza na cidade, mas já anteriormente houvo outros casos de ataques fascistas, quase sempre com envolvimento de elementos militares. Tanto o agredido como a sua organizaçom política denunciam a impunidade com que atua o fascismo e espera-se que nos próximos dias haja umha resposta popular à agressom.

A Catalunha tem sido nos últimos anos o principal cenário da atuaçom violenta e impune de grupos de extrema-direita, mas também a Galiza está a assistir à atuaçom de fascistas que contam com a cumplicidade e o silêncio dos grandes meios de comunicaçom do sistema.