Cada participante pode apresentar um ou vários trabalhos a concurso, circunscritos cada um deles ao termo dumha povoaçom, no que se recolherá o máximo possível de topónimos: nomes de lugares e casas, rios e lagoas, montes e acidentes orográficos, prados e caminhos, fontes e cruzes… Os topónimos, em qualquer caso, tenhem que estar recolhidos oralmente entre a populaçom do termo e nom se vam aceitar variantes artificiosas ou que só sejam de tipo documentário ou administrativo.

As descrições de topónimos e a informaçom adicional, que podem estar redigidas em qualquera das línguas do Berzo (galegoportuguês, asturoleonês ou castelhano), tenhem que entregar-se antes do 15 de outubro do 2016, indicando “Concurso de Recolha Toponímica”, e incluindo em página à parte os dados pessoais do autor, por correio electrónico a Este endereço de email está sendo protegido de spambots. Você precisa do JavaScript ativado para vê-lo. ou por correio postal a: El Teixu, Rede pal Estudiu y Defensa de la Llingua Asturllionesa. Calle Teleno, 3 - 2º. 24350 Veguellina (Leom).

Um júri formado por três pessoas, escolhidas entre membros de El Teixu, expertos em linguística e geografia e estudiosos do Berzo, que nom conhecerám a autoria dos trabalhos, vai outorgar, antes do 31 de dezembro do 2016, um único prémio, consistente num diploma e um lote de livros de temática berciana e asturoleonesa. O júri pode estabelecer até três accésits, que receberám também livros como prémio.

Vai avaliar-se positivamente a inclussom de fotografias e mapas que permitam a identificaçom e localizaçom dos topónimos. Igualmente, os trabalhos podem incluir material adicional sobre história, geografia, etnografia e vocabulário do termo em questom, assim como gravações ou material audiovisual.

Na primeira ediçom do Concurso de Recolha de Toponímia Oral de El Teixu na Comarca do Berzo, celebrada em 2014, resultou ganhador Ivo García Álvarez, com o trabalho “Toponimia menor de Quintana de Fuseros”. Ademais, José Álvarez González fora premiado com un accésit polo trabalho “Mapa de topónimos”, dedicado também á povoaçom de Quintana.

Com esta campanha, El Teixu quer pôr em valor o património que representa a riqueza toponímica, que, esquecida pola administraçom, ainda permanece viva na comarca, como umha mostra mais da cultura berciana que se expressa em galegoportuguês e em asturoleonês. A toponímia tradicional é um tesouro de valor incalculável, que é preciso recolher antes que desapareça.

El Teixu, Rede pal Estudiu y Defensa de la Llingua Asturllionesa é umha associaçom fundada no 2007 por gente da Terra de Miranda, Samora, Leom e Astúrias para defender o asturoleonês desde a sua unidade e o respeito às variedades internas. Para isso desenvolve atividades de estudo, divulgaçom e promoçom por todo o ámbito do idioma.