Histórica dirigente do PSG, sempre comprometida com posiçons soberanistas e de esquerda, Dores Arribe participou na constituiçom do padrom reintegracionista galego, sendo discípula intelectual de Ricardo Carvalho Calero.

Integrante da AGAL primeiro e da Fundaçom Artábria mais tarde, participou e apoiou todo o tipo de iniciativas sociais e em defesa dos direitos civis, mantendo sempre um profundo compromisso prático com o idioma com umha perspetiva explicitamente reintegracionista e nacional.

A seguir, reproduzimos na íntegra o comunicado difundido hoje pola Fundaçom Artábria.

Lembrança e homenagem a Dores Arribe do Pico

Tendo conhecimento do falecimento de Dores Arribe do Pico, aos 78 anos, no seu Ferrol natal, a Fundaçom Artábria quer fazer pública a sua saudosa lembrança de quem foi firme defensora da nossa língua durante toda umha vida e sócia da nossa entidade durante anos.

Destacada dirigente política nas fileiras do Partido Socialista Galego (PSG) nos anos 70, desenvolveu posteriormente um nom menos destacado ativismo intelectual nas fileiras do reintegracionismo lingüístico mais militante.

Discípula, amiga e profunda admiradora de Ricardo Carvalho Calero e da sua obra intelectual, participou junto a ele na geraçom de intelectuais reintegracionistas que, nas décadas de 70 e 80, construírom, defendêrom e promovêrom o galego na sua legítima forma reintegrada. Foi sócia da AGAL na década de 80, participando em vários dos seus Congressos Internacionais da Língua Galego-Portuguesa e como integrante do Conselho Assessor da Revista Agália.

Já nos primeiros anos do novo século, associou-se à Fundaçom Artábria, participando ativamente durante vários anos nas nossas atividades culturais e mantendo com total coerência o seu compromisso lingüístico, cívico e patriótico, que a acompanhou até o derradeiro dia da sua vida.

Caraterizada por umha grande modéstia e sincera entrega à causa da língua e da pátria galega, Dores Arribe do Pico deixou-nos de vez no dia 24 de outubro de 2016.

Para ela, a nossa emocionada lembrança e homenagem. Para a sua família, o nosso pesar sincero pola grande perda de umha galega digna e exemplar.

Junta Diretiva da Fundaçom Artábria

Ferrol, 25 de outubro de 2016