Disponível no seu site, o Dicionário Galego do Basquetebol oferece quase 950 termos galego-portugueses, consoante o padrom reintegracionista galego, tencionando combater a degradaçom lexical e semántica que vem verificando-se historicamente na Galiza, à medida que o espanhol se impom.

O Dicionário pode ser consulado online na ediçom no serviço issuu, ou entom descarregado como pdf para livre utilizaçom em quaisquer dispositivos digitais de leitura.

Antes deste volume, a AEG difundiu já um Dicionário Galego do Futebol, incluindo o futebol británico e o gaélico, cuja prática está bastante difundida no nosso país nos últimos anos.

A própria Comissom Lingüistica da AEG explica que tenciona codificar o galego como língua plenamente desenvolvida, vista a falta de compromisso institucional na habilitaçom do galego em ámbitos como o da terminologia.

No prólogo, anunciam-se novos contributos na mesma direçom da restauraçom lingüística galega, abrindo-se também a possibilidade de serem enviadas sugestons e eventuais correçons.