"A COG XA É A CIG
A COG, despois dun período de transición, intégrase totalmente na CIG. Así que, xa sabedes, a partir de agora, definitivamente a está en Mercadona para quedarse.
Ao voso servizo sempre. Coas ideas claras e sen medo, estamos sempre dispostos a axudarvos.
Somos o único sindicato que defende os intereses dos traballadores e traballadoras de Mercadona. Con valentía e independencia. Sen calarnos nunca e sempre ben preparados para explicar a realidade das nosas condicións laborais e intentar mudalas.
A pesar de que as reunións do Comité están preparadas para que a empresa repita até a saciedade a súa mensaxe triunfalista, nós transmitimos os verdadeiros problemas existentes nas tendas.
Á empresa non lle queda máis remedio que recoñecer certas situacións e comprometerse a solucionalas. Interésanos resaltar algún asunto que, con insistencia, repetimos en tódalas reunións: —Calquera alteración horaria ou o traballo en festivos é totalmente voluntario. Así o recoñece a empresa cada vez que denunciamos situacións onde se “convence” aos traballadores para realizar cambios en contra da súa vontade. —Se apreciades calquera exceso de celo no cumprimento das normas ou abusos de autoridade por parte de calquera superior, comunicádenolo. Grazas á vosa colaboración xa se realizaron medicións específicas de riscos psicosociais en dúas tendas da Coruña e a situación mellorou. —Ante calquera papel que vos fagan asinar, esixide unha copia para vós. É unha obriga que ten a empresa e así conseguimos que o recoñecese. Non é normal asinar ningún documento e non quedarse cun duplicado. —Temos á vosa disposición escritos para revogar a cesión de datos médicos que fixeron asinar á maioría do persoal.
Xa sabedes. Para calquera dúbida, consulta, queixa, reclamación... as delegadas e delegados da CIG estamos á vosa disposición en calquera momento. Somos os únicos que garantimos a total confidencialidade e que traballamos con independencia da dirección da empresa. Só ao servizo dos traballadores."