Editou milleiros de panfletos, folhas volantes e documentos de análise sobre as pensons.

A Confederaçom Intersindical Galega (CIG) acabou de iniciar a repartiçom do material informativo que fai parte da campanha para a recuperaçom dos direitos laborais e sociais perdidos nos últimos anos. A central editou milhares de panfletos e folhas volantes para explicar os detalhes da iniciativa e um documento de análise sobre as pensons, que serám distibuídos nos centros de trabalho e na ruas.

A CIG já começou com a distribuiçom do material informativo, que fai parte da campanha de conscientizaçom, acumulaçom de forças e mobilizaçons que acabou de pôr em andamento, visando recuperar os direitos laborais e sociais perdidos nos últimos anos.

Os representantes do sindicato repartirám nos próximos dias por boa parte dos centros de trabalho e das ruas de todo o país milhares de panfletos e folhas volantes, explicando a iniciativa, e de documentos de análise sobre as pensons, nos quais se desenvolvem as propostas e alternativas da central ao respeito.

Manifestaçom nacional em Santiago

Com esta campanha informativa, pretende-se também chamar o conjunto da classe trabalhadora a participar na manifestaçom nacional que terá lugar em Santiago no sábado 28 de janeiro em defesa do sistema público de pensons. A marcha, com que se dará início às mobilizaçons previstas na campanha pola recuperaçom de direitos laborais e sociais, partirá da Alameda às 12.00 horas.

Além disso, no quadro desta campanha também estám previstas concentraçons comarcais 15 de fevereiro e mobilizaçons 10 de março, sem descartar a convocaçom de umha greve geral para os meses de abril ou maio, se após o desenvolvimenot desta iniciativa de conscientizaçom e de acumulaçom de forças nom se aprovam no Congresso espanhol medidas que permitam a recuperaçom de direitos perdidos.