A festa vai dar comezo ás 19:00, como xa é habitual, con proxeccións. Desta volta, tratase de tres curtametraxes que teñen como fío conductor a música, o baile, os bares e un certo ton agridoce. O señor Jazz mozo é unha comedia do slapstick silente na que Harold Lloyd e Bebe Daniels refúxianse nun tugurio da era do jazz. En Those Were the Days, videoclip de Aki Kaurismäki para os Leningrad Cowboys, son un inmigrante e o seu burro os que se recollen nun bar parisino. E en Mentres teñamos a embriaguez, ópera prima de Pollet asistimos aos intentos de Léon, interpretado por Claude Melki, para atopar con quen danzar nas salas de baile dos arrabaldes de París.
Tras as proxeccións, as actuacións musicais ao vivo terán lugar a partir das 21:00, comezando coa actuación de MounQup. MounQup é Camille Hedóuin, francesa afincada en Saumede (Ourense) que fai experimentos máxicos coa súa voz. Por riba de sons electrónicos, toma miles de formas e rexistros diferentes á vez pero transmite sempre unha paixón verdadeira, haxa ou non palabras, sexan estas na lingua que sexan. No seu directo, constrúe as estruturas musicais dende cero, con elementos que se va sumando en forma de loops.
A continuación será a quenda de Guateque Escampe, o baile de máscaras de Ataque Escampe. O grupo compostelán, formado por Álvaro Trillo, Lois G. Carlín, Samuel Solleiro, Miguel Mosqueira e Roi Vidal interrompe por un intre a presentación do seu novo disco Primeiros bicos para presentarnos un peculiar Mr. Hyde musical: en lugar de tocar as súas cancións alegres e tristes que poden bailarse, interpretarán cancións alegres e tristes que poden bailarse pero feitas por outros. De onte e de hoxe.
E contaremos tamén con Lamprea Explosiva, “un dúo de punk podrido criado na noxenta cidade industrial de Citroën”. Os vigueses Alén (guitarra) e Adán (batería) fan puro punk primitivo, sucio e con moito sentido do humor, acelerados pildorazos de guitarras distorsionadas e incisivas baterías e ruidismo gamberro y descontrolado. Himnos moi breves sobre un abano moi amplo de cousas, dende o pemento ata a Revolución Rusa. Jumento, publicado no 2016, é o seu último disco.
Durante os concertos vai entregarse tamén o premio do certame OH MY GIF, para creacións en formato .gif orixinais e contextualizadas en Compostela. Para finalizar a noite, contaremos cun nome xa ben coñecido nas festas do cineclube, DJ Chapaev, que como xa é habitual porá o fin de festas cunha sesión de picadiscos.
Os filmes van ser proxectados na súa versión orixinal, con subtítulos en galego nos casos en que sexan necesarios. A entrada aos concertos será de entre cinco e oito euros, á vontade dos e das asistentes, destinados integramente aos grupos.
Sábado 22 de abril a partir das 19:00h no Pichel
Festa do 16º aniversario do Cineclube de Compostela
19.00 | Proxeccións
O señor Jazz mozo
(Young Mr. Jazz, Hal Roach, EUA, 1919, 10′, VOSG)
Those were the Days
(Those were the Days, Aki Kaurismäki, Finlandia, 1992, 4′, VO)
Mentres teñamos a embriaguez
(Pourvu qu’on ait l’ivresse, Jean-Daniel Pollet, Francia, 1958, 20′, VO)
21.00 | Concertos | Entradas para as bandas: de 5 euros a 8 euros.
Mounqup
Guateque Escampe
Lamprea Explosiva
+ Entrega de premios de OH MY GIF
00.30 | Picadiscos
Sesión DJ Chapaev