Este sábado, día 22 de outubro, ás 19 horas, no auditorio do Centro Ágora, terá lugar a representación da peza teatral de Manuel María, Abril de lume e ferro, a cargo da Asociación de teatro e cultura Abril de lume e ferro de Carral. Dita representación dramatizada encádrase dentro das distintas actividades que a Fundación Manuel María de Estudos Galegos organiza ao longo deste ano 2016 en que o escritor de Outeiro de Rei é o homenaxeado nas Letras Galegas.  

Abril de lume e ferro, foi escrita por Manuel María en 1974 –non viu a luz até a edición realizada polo Concello de Carral en 1989- e recrea os acontecementos que supuxeron o levantamento liberal e galego de 1846 e que remataron co fusilamento das persoas sublevadas, os Mártires de Carral. A peza, constitúe unha destacada achega á escena galega, e forma parte da produción teatral de Manuel María, que se inicia en 1956 como creador teatral.

Manuel María consciente do valor didáctico do teatro e da súa capacidade de intervención, vai escribir ao longo da súa vida 36 obras de moi distinto formato (farsas, autos, obras infantís…) e de temática moi diferente, na que hai que salientar a ficcionalización dramática de acontecementos e procesos fundamentais da historia de Galiza, con vontade de recuperación e de creación de conciencia, na que se afilia Abril de lume e ferro.   

Abril de lume e ferro, vén sendo representada de maneira continuada en Carral, pola súa veciñanza, desde hai máis de vinte anos e tamén foi escenificada en Pontevedra, Lugo, Betanzos, Vilalba, O Valadouro… Na súa posta en escea participan máis de vinte actrices e actores amadores e a banda sonora está formada de pezas, aínda non editadas, do grupo musical “A quenlla”.

A obra é de balde, até completar a capacidade do auditorio do Centro Ágora, e conta coa colaboración do Concello da Coruña.