Erguer- Estudantes da Galiza convoca ao estudantado galego à greve por primeira vez no ano académico, achando que é momento de bater com força contra a tentativa do Estado espanhol de reforçar o caráter espanholizador, privatizador, segregador, machista e ao serviço do grande capital do nosso ensino.

Esta quinta-feira 24 de novembro, o movimento estudantil galego e Erguer tenhem a possibilidade de mostrar mais umha vez as suas potencialidades organizativas e de mobilizaçom, tal como leva fazendo décadas e como já fijo Erguer o ano passado. Sem dúvida algumha, a dia de hoje Erguer Estudantes da Galiza, é a melhor ferramenta das estudantes galegas para organizar-se e luitar por um ensino galego, democrático, de qualidade, nom patriarcal e público. Só a auto-oranizaçom do estudantado pode levar a umha defesa efetiva dos nossos interesses como moças galegas, só e unicamente a nossa constante luita nas ruas e nos centros de ensino de todo o país fará que consigamos os nossos objetivos.

Por isso, centos de estudantes organizadas em Erguer, levam duas semanas trabalhando sem descanso por todo o país. Assembleias abertas, jornadas de trabalho, agitaçom, propaganda e um longo listado de tarefas cumpridas, para que o sucesso desta greve seja significativo e ouvido pola Junta de Galiza e o Governo espanhol, para que Espanha e o Capital acatem as exigências do estudantado. É preciso que este 24-N as aulas dos liceus da Galiza fiquem totalmente vazias e as ruas, pola sua contra, intransitáveis.

De BRIGA transmitimos o nosso apoio a Erguer, pois achamos que a organizaçom estudantil plural da esquerda independentista e nacionalista pode responder a todas as inquedanças do estudantado galego e que só umha organizaçom forte, com os princípios claros mas com indiscutível pluralidade, pode ser quem de defender e luitar polo seu.

O 24-N vaziemos as aulas e saimos às ruas com Erguer.