Como estudante recentemente incorporada à militância de Erguer. Estudantes da Galiza manifesto o meu descontento coa impressom que a organizaçom transmite cara ao exterior. Umha impressom dogmática, em que as relaçoms com o resto do movimento estudantil semelham inexistentes, atuando em solitário sem passar polas assembleias. Acarrejando umha visom nada democrática nem de auto-organizaçom por parte deste espaço.
As potencialidades de Erguer. Estudantes da Galiza como ferramenta unitária do estudantado galego deveria exigir o respeito da democracia cara às companheiras militantes. Umha organizaçom de massas estruturada em chave independentista sem desconfianças nem dinámicas prejudiciais por parte de organizaçoms políticas que intervenhem aqui para alimentar as suas próprias estruturas.
Entendendo as linhas que conheço de Erguer. Estudantes da Galiza que advogam por umha “autonomia da organizaçom”, difere da realidade dum jeito mui diferente. O isolamento do MEG, esquecendo o resto do estudantado organizado com objetivos comuns aos nossos, caminhando face a umha direçom destrutiva desta ferramenta. Erguer. Estudantes da Galiza deve respeitar dita autonomia, para ser capaces de trabalhar em espaços plurais sem medo a perdê-los, já que há conteúdos, formas de luita e objetivos que só nós –como organizaçom unitária do estudantado independentista- podemos achegar ao movimento estudantil galego. Só baixo esta fórmula, levando a nossa visom da luita ao conjunto do estudantado (organizado e nom), poderemos melhorar as condiçons materiais das estudantes.
Opino que esta organizaçom segue a ser necessária para continuar com as luitas do movimento estudantil independentista galego, mais com umhas condiçons reais, democráticas, assembleárias e de verdadeira auto-organizaçom em unidade com o resto do estudantado popular.
Umha luita por um ensino para as classes populares galegas com umha militância ativa nos grupos de base, para obter, entre todas, um ensino público, democrático, independentista, de qualidade e anti-patriarcal.