A citada avenida forma parte do Camiño Mozárabe-Vía da Prata do Camiño de Santiago, Patrimonio da Humanidade e Itinerario Cultural Europeo,  de xeito que a talla destas árbores entraría en contradición coas recomendacións da Guía de Boas Practicas do Camiño de Santiago.

Melloras si, pero non a costa das árbores

Dende a plataforma Amigas e Amigos das Árbores da Limia insistien, "nós non nos opoñemos á mellora da Avenida de Celanova, consideramos que si que deben levarse a cabo as obras necesarias na rúa: alumeado, saneamento, arranxo de beirarrúas... Pero si que estamos en contra do ensanchamento da rúa cortando máis de medio cento de árbores!"

Coma os propios datos da Policia Local de Xinzo de Limia recollen, o treito obxecto desta intervención prevista pola Axencia Galega de Infraestrutura ten unha baixa siniestralidade. Pola contra, o ensanche desta avenida suporía un aumento considerable do tráfico pesado, co conseguinte risco de accidente para peóns e condutores. Medrarían ademais o ruído, a contaminación acústica, a suciedade, a contaminación ambiental…

En definitiva, levar adiante esta obra sen sentido suporía unha perda importante para a calidade de vida dos residentes da Avenida de Celanova e en xeral para o benestar de todos os vecinos e veciñas de Xinzo de Limia. As árbores dan sombra, permiten un aforro de enerxía tanto no verán coma no inverno ás vivendas desta rúa, revalorizan o prezo dos inmobles, diminuen a contaminación e melloran a saúde dos cidadáns e o seu estado emocional.

Propoñen alternativas

A solución ao tráfico pasa polo acondicionamento das circunvalacións xa existentes para que sexa posible o desvío dos vehículos pesados por fóra da vila. Hoxe en día os camións de grande tonelaxe non poden pasar por esas vías e se anchean a Avenida de Celanova como pretenden nunca farán estas necesarias circunvalacións e condenarán aos veciños e veciñas a soportar o paso do transporte pesado atravesando o medio de Xinzo de Limia.

Retirar espazos verdes para derivar o tráfico pesado polo centro dunha vila sería ir en contra dos proxectos urbanísticos que na actualidade se levan a cabo nos países máis desenvolvidos.  

Apadriñamento de árbores

Así mesmo continuan coa campaña de amadriñamento e apadriñamento das árbores da Limia á que se uniron xa medio cento de persoeiros das letras, da televisión, da música e da cultura en xeral.