Son un grupo de sete veciños/as que voluntariamente ofrecen un  traballo feito dende o seu punto de vista. "Cremos que é fundamental partir do respecto ás tradicións e unha boa convivencia,  por iso este ano,  igual que o pasado, temos unha exposición de carteis nos que se poden ver mensaxes  sobre a nosa festa" . Este ano publican un libro co programa onde se poderán ler recomendacións de como se viste a Pantalla e o que debe facer  e non facer unha Pantalla. Un artigo moi interesante sobre o noso Entroido e unhas entrevistas moi emotivas que se lle fixeron a xente con gran experiencia na nosa festa.

Volven apostar por un Oleiro tradicional,xa que pensamos que no  noso Entroido  hai lugar para todo dado a súa gran variedade.

Este ano haberá como novidade no Sábado do Colgamento do Meco un concerto á noitiña do grupo Pelepau e o Domingo Oleiro estaremos acompañados por grupos de música tradicional da Limia, así que,  festa asegurada.

Haberá un número considerable de baños públicos despois da gran acollida do ano pasado.

Dende a comisión queren  fomentar un Entroido limpo e xerar a menor cantidade de lixo posible e que a rúas non estean  cheas de vidro, por iso fixeron un vaso reutilizable que todo o mundo poderá mercar nos locais indicados  por 2 euros.

Quixeron darlle o seu espazo aos máis cativos por iso levan a cabo un obradoiro en colaboración co as ANPAS de os CEIP Rosalía de Castro e Carlos Casares chamado “Retrincos de Entroido” onde os nenos e nenas  colaboran na decoración das rúas. Para eles tamén hai espazo no programa, terán unha actuación o venres pola tarde e outra o luns. O Domingo de Piñata tamén estará dedicado a eles.

Este ano contan cunha gran variedade de charangas, empezando polas da casa, xa que en Xinzo temos unha gran canteira de músicos e seguindo por charangas do resto de Galicia, Asturias, Valladolid, León, Logroño e ata Portugal.

"Esto é un pouco a competencia da Comisión organizadora do Entroido. Outras materias coma limpeza e seguridade son competencia do Concello. Dende a nosa parte simplemente desexar a tódolos veciños e visitantes o mellor dos Entroidos", frisan.