O Diário Liberdade acompanhará ao vivo, mais um ano, o Dia da Pátria na Galiza, um dia assinalado nas mobilizaçons populares e da esquerda no país europeu. Para além do trabalho de internacionalizaçom da importante data, para o qual o portal informativo popular tem lançado um apelo para a incorporaçom de colaboradoras/es e ativistas para esses dias, o Diário Liberdade estará presente este ano nas ruas compostelanas.
Será no dia 25 de julho, ao longo de toda a tarde, com um posto no Festigal, que se celebrará entre as 14.00 e as 21.00 do dia 25 de julho, com umha programaçom concertos, palestras, feira de artesanato e espaço associativo, onde o Diário Liberdade terá a sua banca. Isso para além dos concertos da noite do dia 24.
A banca do Diário Liberdade será o ponto físico em que as pessoas interessadas em conhecer mais o projeto poderám achegar-se para conversar com as e os membros do Coletivo Editor na Galiza. Também quem tiver interesse em conhecer o processo para incorporar-se como ativista poderá visitar o posto e consultar as dúvidas que tiver.
O Diário Liberdade está a preparar umha ediçom de material especial, cujo lançamento será precisamente dia 25 no posto do jornal online no Festigal: estamos a falar de umha série de postais comemorativas de personagens revolucionários do mundo - incluíndo o nosso Castelao, refletidos no pincel de Maurício Castro; dos últimos exemplares de 'A estória do Apalpador, o carvoeiro mágico do Courel', de Diego Bernal- numha oportunidade única para conseguir a ediçom, praticamente esgotada; e de umha nova coleçom de imans. Isso somar-se-á às obras já editadas polo Diário Liberdade em tempos recentes: a ediçom comemorativa de 'O Imperialismo, fase superior do capitalismo', de Lenine; 'A Doninha e o Taxidermista', de Séchu Sende; 'Camaradas do Metal', de diferentes bandas de rock da Galiza, para além de camisolas e os imans já editados em anos passados.
Para terminar, será também umha boa oportunidade de participar na Campanha de Financiamento anual com que o Diário Liberdade quer fazer sustentável o projeto. Para essa data, estará já nos seus últimos dias e será importante receber todo o apoio que um site sem fins lucrativos necessita para poder continuar a internacionalizar a causa galega.
As pessoas que nom podam visitar o posto durante a tarde do Dia da Pátria, terám umha oportunidade mais breve para contatar com o Diário Liberdade na manhá desse mesmo dia na Alameda, onde será instalada umha pequena banca provisória na hora prévia às manifestaçons convocadas.