Os direitos nacionais fôrom protagonistas de várias mobilizaçons e atos políticos na capital da Galiza, tal como o Diário Liberdade informou ao longo da jornada.

Já nas vésperas, a juventude independentista marchou polo centro histórico, com a adesom de mais de 20 entidades, por iniciativa de Briga e Isca!, que quigérom dar assi umha nova dimensom à mobilizaçom anual. Entretanto, Galiza Nova realizou a sua própria ruada, no fim da sua homenagem habitual a Rosalia de Castro em Bonaval.

Já no dia 25 de julho, o BNG percorreu a partir do meio-dia o centro de Compostela, com umha importante participaçom e um ambiente festivo que, como sempre, concluiu na praça da Quintá com um discurso da sua porta-voz, Ana Pontom. Na jornada, comemorou-se o meio século da primeira convocatória realizada pola UPG, ainda em pleno franquismo (1968) e a morte de um dos seus fundadores, Bautista Álvarez, no passado ano. Referências à igualdade, à soberania e ao fim do colonialismo estivérom presentes no discurso da dirigente do BNG.

Por seu turno, o independentismo tivo umha manifestaçom alternativa pouco depois da do Bloque. Causa Galiza centrou a sua reivindicaçom independentista no rejeitamento do autonomismo e na proposta de um proceso de reformulaçom do projeto, chamado "Trevinca", que lançarám em outono, mas já presidia o cenário da praça do Toural, onde se congregárom os e as manifestantes.

Um grupo de militantes de Agora Galiza também se congregou na praça 8 de março num ato político independentista.

O espaço político correspondente à Maré, Podemos, IU, Anova, etc, tivo convocatórias divididas, consoante as tendências internas, em diferentes espaços da capital galega.

Na parte da tarde, atividades culturais e de lazer fôrom realizadas no Cámpus Sul, durante o Festigal, organizado anualmente polo BNG e com espaços para que o associativismo mostre as suas atividades e iniciativas de todo o tipo às numerosas pessoas que visitam a área, incluindo um espaço infantil.

Mais informaçom sobre os atos patrióticos de 24 e 25 de julho, Dia da Pátria Galega de 2018 aqui