Com essa lembrança, várias organizaçons do país sul-europeu reivindicárom o texto em atos organizados hoje e amanhá (29 e 30 de outubro) em Sevilha. Lembram que a de Antequera foi umha constituiçom "fundamentada na soberania andaluzia e as necessidades do Povo Trabalhador Andaluz".

Do Comité Organizador das segundas Jornadas por la Constitución Andaluza lembram que "os andaluzes temos já a nossa própria Constituiçom que é a Constituiçom Andaluza de 1883", e acrescentam "Nom necessitamos a Constituiçom [espanhola] de 1978 que nos pujo novas correntes" como "desde fai séculos".

As jornadas começárom esta manhá com umha mobilizaçom na capital andaluza, e nas mesas que seguirám tratar-se-ám temáticas como a cultura popular, a economia alternativa para umha Andaluzia livre e haverá debate político sobre como caminhar para a libertaçom nacional.

Umha constituiçom soberanista, social e feminista

O artigo primeiro daquela constituiçom, assinada em 1883, estabelecia que “Andaluzia é soberana” e que “nom recebe o seu poder de qualquer outra autoridade exterior”.

Ainda, propunha como objetivo da naçom andaluza “preparar a chegada da verdadeira igualdade social, mediante a independência económica do povo”, reconhecia, entre outros, “o direito ao trabalho” (…) à "instruçom gratuita” (…) “à propriedade limitado polos direitos sociais” (…) e ao “sufrágio universal permanente”, ou “a independência civil e social da mulher”.

Umhas propostas que, sem ser abertamente revolucionárias no social, som sim muito avançadas frente ao atual quadro neoliberal.

Hoje, Andaluzia sofre a opressom de Madrid, tal como vários outros países na Península Ibérica, embora as reivindicaçons dessa naçom tenham ficado num segundo plano quando comparado às galegas, catalás ou bascas. As jornadas tencionam recuperar e atualizar o texto constitucional com o alvo de "libertar a Andaluzia e a Humanidade".