O jogo Galiza - Venezuela de ontem (20/05) na Corunha valeu para levar às ruas e ao estádio as constantes reivindicaçons populares polas seleçons nacionais galegas. Sob a legenda "Galiza naçom, oficialidade", e com convocatória de Siareir@s Galeg@s, reclamou-se horas antes do jogo que as diferentes seleçons galegas podam competir de forma oficial nos campeonatos internacionais. Fôrom centenares as pessoas que aderirom a convocatória do coletivo que, durante anos e sem qualquer classe de apoio oficial - antes, sim, com a hostilidade do extremista Partido Popular e da afim Federaçom Galega de Futebol, que terá pressionado jogadores e jogadoras para nom participarem nos eventos organizados por Siareir@s Galeg@s- mantivo a pauta e convocou regularmente jogos da seleçom nacional galega frente a equipas internacionais - o último deles em dezembro de 2015 frente a Senegal.

Na manifestaçom de ontem denunciou-se também que a convocatória das instituiçons do desporto-negócio - "casualmente" em vésperas de convocatórias eleitorais - excluísse na sua convocatória a metade da populaçom galega: nom houvo jogo da seleçom feminina, por nom falar de jogo com seleçons mistas. Fôrom centenares as pessoas que percorrêrom as ruas da Corunha.

Logo do jogo, continuou a celebraçom com um concerto organizado por Briga, Siareir@s Galeg@s, Gomes Gaioso e Acunhas e Foucelhas.

O jogo entre a Galiza e a Venezuela de ontem nom fijo esquecer quem defende verdadeiramente as seleçons nacionais galegas, qual a importáncia do desporto de base frente à competitividade e o espetáculo de massas e quanto caminho fica por percerorrer até libertar-nos do patriarcado (também no futebol).

O jogo

As seleçons da Galiza e a Venezuela terminárom 1-1 o jogo de ontem. A Galiza dominou o jogo e foi à frente grande parte do tempo, com um golo de Iago Aspas no final do primeiro tempo. No entanto, os movimentos finais da Venezuela servirom para que Josef Martínez conseguisse o 1-1 definitivo. Embora fosse patente o nulo treinamento conjunto dos galegos, o domínio da seleçom local foi patente, demonstrando que a seleçom nacional galega teria potencial para participar com bons resultados nas mais importantes taças internacionais.