O xoves 16 de xuño tivo lugar a primeira das sesións que compoñen as xornadas “Olladas da Resistencia e a Represión” que continuarán ata o 30 do mesmo mes, e estarán presentes en Santiago de Compostela, Redondela e Vigo.

As xornadas “Olladas da Resistencia e a Represión” buscan facer unha análise de como é o día a día dos millóns de persoas no mundo que sofren reiteradas violacións de dereitos como consecuencia dos intereses xeoestratéxicos e a aplicación das políticas neoliberais. Ademais estas xornadas pretenden amosar como son os procesos sociais que se producen neste tipo de escenarios, tanto no interior, a través da organización da poboación para facerlles fronte, como no exterior, coa construción dunha cultura e un discurso baseados na xenofobia e o racismo que se afasta en moito da situación real.

Cada unha das palestras acheganos, a través de diversas voces que estiveron sobre o terreo, posibles alternativas para afrontar ese tipo de situacións así como casos concretos de como se estruturan modelos de construción colectiva que permiten o exercicio, respecto e defensa dos dereitos das persoas nese tipo de marcos.

O programa das xornadas que aínda fica por celebrarse confórmase do seguinte xeito:

- Mércores 22 de xuño, 20:30 (Café Uf, Pracer, 19, 36202 Vigo)

O Camiño Cara a Ningures Da U.E.

Conferenciantes: Juan Teixeira (reporteiro documental especializado en temáticas sociais) e Pablo González (colaborador do diario Gara e Naiz, especializado nas resistencias en Europa do Leste).

- Xoves 30 de xuño, 20:30 (Teatro Ensalle, Rúa de Chile, 15, 36202, Vigo)

Islamofobia, Xénero E Movementos Sociais

Conferenciante: Brigitte Vasallo (feminista anti-racista, mediadora intecultural, periodista colaboradora habitual de medios como Eldiario.es, Diagonal e Pikara).