Ao que todo indica, hoje o Parlament irá votar a declaraçom jurídica e política da criaçom da nova República da Catalunha: umha emenda à totalidade do regime espanhol, que refletirá a nova realidade que já se vive na Catalunha, negando o poder espanhol nesse país.

O interpelado nº 1 pola declaraçom, se chegar a ser aprovada como parece, será o monarca e chefe do estado espanhol, Felipe VI, que vê o seu "reino" esquartejado por um golpe de mao popular, como tantas vezes já aconteceu na história da Europa. Daí a desesperaçom dele e de todo o regime de 78, que já aplicárom violência explícita no dia 1 de outubro e agora ameaçam com desmantelar a Autonomia catalá.

O presidente catalám está sob ameaça de detençom, para ficar o poder autonómico em maos do executivo de Madrid. Muitos milhares de pessoas apoiam nas ruas a iniciativa institucional que dá resposta à maioria social independentista.

Resta saber como será realizada a autoproteçom de todo um povo e das suas instituiçons frente à ofensiva reacionária do Estado espanhol, a partir de manhá mesmo. Que a revolta popular se ative e culmine umha revoluçom democrática nom só contra o Estado espanhol, mas contra umha Uniom Europeia inequivocamente alinhada com a reaçom espanhola.

Concentraçons solidárias na Galiza

Entretanto, hoje voltam a convocar-se mobilizaçons galegas em apoio ao povo catalám. Convoca a Plataforma Galiza com Catalunha, será às 20 horas e estas som as localidades em que se realizarám concentraçons:

Compostela, na praça do Toural

Lugo. na Subdelegaçom do Governo espanhol

Ponte Vedra, na praça da Peregrina

Ferrol, na praça Amada García

Cangas do Morraço, na Cámara municipal

Vila Garcia, na praça da Galiza

Corunha, na Subdelegaçom do Governo espanhol

Ourense, na Subdelegaçom do Governo espanhol

Vigo, na 'Farola de Urzáiz'

Viveiro, na Cámara municipal

Ribadeu, na Cámara municipal