Com o lema “Mudar as nossa consciências, mudar as nossas vidas”, as jornadas místicas decorrem em diferentes pontos da cidade e da província de Ourense, contando com a colaboraçom da Cámara Municipal da capital, em poder do Partido Popular.

A programaçom inclui exposiçons artísticas e poéticas, assim como palestras sobre temas alegadamente "filosóficos", incluindo representantes de seitas orientalistas e antroposóficas diversas, procedentes de diferentes países.

É o caso de Koldo Aldai, representante da chamada “Red Ibérica de Luz”, grupo dedicado a difundir missons divinas em torno da reencarnaçom, a ascensom, a quinta dimensom e a ajuda através do pensamento...

Outros participantes chegados do Brasil e Portugal farám exposiçons sobre antroposofia, eubiose, teosofia e outras doutrinas místicas sectárias, ministradas por homeópatas, mestres reiki e ensinantes de "estudos eubióticos".

A programaçom desta "semana da paz" combina todo o tipo de atividade sectária e pseudocientífica com apoio da instituiçom municipal ourensana. Como mostra dos conteúdos previsíveis, indicamos dous vídeos:

O primeiro, protagonizado por Koldo Aldai, que estará presente nos atos da próxima semana em Ourense:

E o segundo, da organizaçom “Red Ibérica de Luz”, criada polo próprio Koldo Aldai.

Nom é a nossa intençom dar publicidade a atividades a caminho entre a pseudociência e as seitas religiosas, mas sim julgamos importante denunciar a crescente colaboraçom de instituiçons públicas galegas com todo o tipo de iniciativas dessa índole.