Posicionamento de Galiza Em Pé perante as Eleiçons Autonómicas 2016
20 de Setembro de 2016
Galiza em Pé! [Foro Independentista Galego] anuncia a decisom coletiva de votar ao BNG nas Eleiçons Autonómicas que terám lugar em 25 de setembro e convida os setores populares independentistas hoje sem referente político válido a votarem pontualmente no BNG nesta vindoura cita eleitoral.
Os objetivos exclusivos desta posiçom som dous: primeiro, contribuir com este humilde esforço para encerrar o ciclo de gestom da administraçom autonómica pola extrema direita que se prolonga de jeito quase ininterrompido desde 1981 e abrir assim o terreno de jogo da política nacional trás décadas de bloqueio do Partido Popular e, segundo, evitar, se for possível, a constituiçom dumha câmara exclusiva de forças constitucionalistas espanholas e outras que, embora galegas, optárom por própria vontade e interesse por se subordinarem a àquelas, sacrificando qualquera perspetiva de construçom e liberaçom nacional.
Queremos exprimir que esta petiçom pontual e pública do voto se formula com patriotismo, por cima de interesses partidários e “em chave de País”, mas de nengum modo é compreensível como aval ou cheque em branco à direçom histórica do nacionalismo tradicional, ou como adesom a um projeto político -o do BNG- que carece de vontade e estratégia independentistas e, embora admite formalmente o esgotamento da inexistente “via estatutária”, teima em apostar o futuro da Galiza e do nosso Povo na perspetiva do “Estado plurinacional” e o impossível “encaixe cómodo” em Espanha como principais horizontes da sua açom sócio-política.
Galiza em Pé! [Foro Independentista Galego], em sintonia com a posiçom histórica do Independentismo Galego, entende que a única perspetiva realista para defender e reconstruir a Naçom, reverter o processo de exploraçom e pauperizaçom maciça à que nos submete Espanha e construir um novo modelo sócio-económico ao serviço da maioria social, é iniciar um processo que nos conduza à Independência Nacional. Nesta direçom, é tarefa urgente criar entre os patriotas galegos e galegas as condiçons objetivas e subjetivas imprescindíveis para construir um projeto político amplo, com vocaçom de massa e estratégia que catalice o processo independentista e a rutura de ataduras com o Estado espanhol.
Na Terra, em 20 de Setembro de 2016